يواصل الشاعر رامي هشام نشر سلسلة “شعْر كروي”
حد يقول للعم كيروش
مين مصر ف أدغال إفريقيا
وبلاش شغل الحلَّق حوش
هبد ف مؤتمرات روبابيكيا
تلبيس ده لطاقية ده
و مهابرة ويَّا مناهدة
ما يفكه بقا من اللون ده
يبلع ريقه كده و يهدا
اختياراتك مسؤول عنها
انت مع جهازك أحرار
إنما تفانين هتفننها
تبقى القصة آخرها دمار
خطط الكورة وسيلة يا سيدنا
لا نصوص ولا كتابات سماوية
شوف الأنسب للي ف إيدنا
فتَّح مخك بس شوية
مش طالبة عناد بقا يا معلم
و اختراعات خليتنا نبلم
مهما يطول الصبر هيخلص
و انا ساكت مش راضي أتكلم
لا انت الفلتة ولا الأستاذ
و اوعى تشوف إن إحنا تلامذة
و كفاية شغل استفزاز
إصحا و فوَّق كده لامؤاخزة
سيڤيهاتك دي بتاعت إمبارح
حلوة انما ماضي على فكرة
في الحاضر خلينا يا فالح
و المستقبل علشان بكرا
قول يا شحاتة و قول له يا جوهري
مين هو المنتخب المصري
إعمام الكورة ف إفريقيا
بالأرقام و الله ما بهري
فبلاش بقا ترفع مناخيرك
إخشع كده و استهدى يا ريس
إقصر شرك و إطرح خيرك
خليك حلو و كوتش كويس
عارفين الفرق إسمع مني
بين الجامد و اللي يضبش
ربنا بس يخيب ظني
لاحسن قلبي بجد ملبش
